Горан Георгиевски и Ромео Костадиновски разрешени и исклучени од Сојузот на стопански комори на Македонија
Управниот одбор на Сојузот на стопански комори на Македонија (ССК) на последната седница донесе одлука за разрешување на Горан Георгиевски и Ромео Костадиновски од функциите потпретседатели на Сојузот. Со оваа одлука, двајцата повеќе не се дел од раководството на ССК.
Покрај тоа, Георгиевски и Костадиновски, како претставници на компании членки, се исклучени и од членството во Сојузот. Од ССК информираат дека тие повеќе немаат никаква формална или неформална поврзаност со организацијата, ниту, пак, имаат право да ја претставуваат или да настапуваат во нејзино име.
„Апелираме до сите медиуми и јавноста да не го користат логото и називот на Сојузот на стопански комори на Македонија во контекст на појавување, изјави или настапи на овие лица, со цел да се избегне погрешна претстава и злоупотреба на имиџот и интегритетот на Сојузот“, се вели во соопштението потпишано од претседателот на ССК, Трајан Ангелоски.
ССК нагласува дека останува посветен на транспарентно и одговорно работење во интерес на стопанството и економскиот развој на државата.
