ГОЛЕМИОТ РИВАЛ НА ЗАРА OТВОРА 500 НОВИ ПРОДАВНИЦИ: Шпанската компанија се проширува на клучните пазари во светот
Шпанската модна компанија Манго планира да отвори 500 нови
продавници до 2026 година.
Планирани се нови продавници на клучните пазари како што се
САД, Канада, Франција, Италија, Обединетото Кралство и Индија и во нејзината
матична земја, соопшти компанијата вчера средата, предвидувајќи скок во продажбата оваа година.
Ривалот на шпанскиот Индитекс, сопственикот на Зара, најави
дека оваа година ќе ја заврши
со приходи кои се зголемени за 12 отсто во однос на 2022 година, на над три
милијарди евра, со поддршка на влезот на брендот Манго за прв пат во американските држави Тексас, Џорџија
и Калифорнија.
Проширувањето, дел од тригодишниот стратешки план што треба
да биде претставен во март, следи по неговото враќање во САД, по два неуспешни
обиди, каде што планира да го удвои бројот на продавници на 40 до следната
година.
Годинава Манго отвори 130 нови продавници и реновира уште
80, а сега има околу 2.700 продажни места на вкупно 115 пазари во светот.
Покрај тоа, семејната компанија соопшти дека ќе назначи уште
четири независни членови во одборот на директори, вклучувајќи го Марко Пуиг,
претседател на шпанската козметичка групација Пуиг, сопственик на брендови како
што се Каролина Херера, Пако Рабан и Шарлот Тилбери. Пуиг, чија компанија
размислува за првична јавна понуда, не презема удел во Манго, основана пред 40
години во Барселона од Исак Андиќ, кој моментално е неизвршен претседател.
Манго од март ќе го прошири одборот на директори на девет
членови за да го зајакне своето корпоративно управување, се вели во
соопштението.
Исто така, Манго објави дека нејзиниот извршен директор Тони
Руиз стана акционер откако купи пет отсто од акциите во компанијата.
фото:EPA-EFE/Alejandro Garcia
