Големата метла наскоро во ГТЦ! Кому му се стемни, а на кого ќе му се раздени?

За еден месец од сега ГТЦ ќе добие нов менаџерски тим, потврдено е со објавата за закажано акционерско собрание на берзата. Според најновите официјални податоци, ГТЦ за првата половина од годинава, заработил два милиони евра, а завршил со добивка од 100.000 евра. Најголема приходна ставка, на поранешниот трговски гигант, е наплатата на паркинг просторот во подземната гаража

Државниот Градски трговски центар (ГТЦ) ќе бира ново раководство за еден месец од сега. Потврдата е веќе официјална и е достапна во целост и на информацискиот систем на берзата СЕИ-НЕТ.

Според објавата на 11 ноември е закажана седница на акционерското собрание на која најголемиот акционер – државното АД за стопанисување со деловен простор ќе избере нов директорски борд.

Во објавените информации нема предлози за нови членови на органот на управување. Но затоа е познато кој ќе ги напушти директорските фотељи. Тоа се: Ѓоко Трајчевски, извршен член на бордот, Трајанка Тасевска, Бранко Цветановски, Стојан Станиславски и Насер Алиу. Овие лица беа поставени на раководни позиции од претходната власт и како што кај нас редовно се практикува, по секоја смена на власта на централно ниво, се менуваат и речиси сите функционери односно именувани лица на позиции со кои управа централната власт.

Кои се новите лица на ГТЦ останува да видиме наскоро кога ќе бидат објавени предлозите за членови на Одборот на директори.

ГТЦ е компанија која порано беше трговска гордост на Скопје. И сега е едно од најфреквентните места, но неговата репутација не е ниту сенка од тоа што била пред дваесетина и повеќе години. ГТЦ е компанија која најмногу приходува од одржување што го наплаќа од кираџиите и од корисниците на околу 560 деловни единици (н.з. дуќани, кафиќи, ресторани).

Најголема приходна ставка е паркингот пред приходите од издавање деловен простор. Камен околувратник на државната компанија е превработеноста. А тоа е потврдено и во извештајот на директорите. Но, заради мир во политичките коалиции на власт досега никој не посегаше да го решава најголемиот проблем. ГТЦ има дури 194 вработени, а главна дејност му е да одржува деловни простори во вкупна површина од 46.000 квадратни метри. Безмалку 50 отсто од целиот расход е за плати на вработените.

Повеќе детали за работата на ГТЦ лани на следниот линк https://faktor.mk/za-zalenje-li-e-drzavniot-gtc-samo-od-parkingot-lani-naplati-nad-500000-evra

Р.Ф.