ГОЛЕМА ИНВЕСТИЦИЈА ОД ОСУМ МИЛИОНИ ЕВРА НАЈАВУВА „МАКСТИЛ“ – еве во што ќе вложува челичарскиот гигант
Огромна инвестиција од близу осум милиони евра најавува челичарскиот гигант во земјава, „Макстил“.
Ќе се купуваат опрема и машини потребни за поефикасно и поквалитетно производство, но и ќе се инвестира во прпоекти за побезбедно работење, како и во подобри услови за работа. Засега не се обзнануваат повеќе детали за планиртаната инвестиција, а сите проекти што се планирани, ќе треба да добијат уште едно дополнително одобрување од Бордот на директори на компанијата.
„На седницата на Одборот на директори на ‚Макстил’ одржана на седми март годинава, одлучено е да се одобри план за набавка на основни средства и нови инвестициски проекти, чија реализација ќе почне во 2024 година, со планиран вкупен буџет од 7.642.806 евра. Финалната вредност на набавените основни средства и инвестициски проекти ќе бидат презентирани во ревидираните финансиски извештаи на друштвото, што ќе бидат реализирани во следните известувачки периоди.
Од „Макстил“ ја информираат инвеститорската јавност преку Берзата дека новите инвестиции во основни средства и инвестициски проекти надминуваат 10 отсто од капиталот на друштвото, определено врз основа на последните ревидирани годишни финансиски извештаи и имаат за цел унапредување на ефикасноста на производствените процеси во компанијата, обезбедување на безбедна работна средина и заштита на здравјето на вработените, подобрување на условите за работа и подобрување на квалитетот на производите.
„Почнувањето со реализација на секој од планираните проекти утврдени во оваа одлука ќе биде предмет на дополнително одобрување од страна на Одборот на директори“, се вели во ценовно чувствителната информација која преку Берзата ја сподели „Макстил“.
Како што неодамна објави Фактор, со добивка од нецели седум милиони евра „Макстил“ ја заврши минатата година. Тоа, како што напишавме, е одлична бројка сама по себе, но е големо намалување во однос на фантастичната 2022 година, која ова акционерско друштво ја заврши со чист профит од 17,5 милиони евра.
Или, како што е објавено во Билансот на успех на компанијата за 2023 година, таа е завршена со добивка по оданочување од 6,55 милиони евра, што е трикратно намалување, или за дури 66 проценти
А, на оваа компанија лани воопшто не и одеше лошо, колку што немаше среќа со солидарниот данок, кој според математиките на државата ја чинеше цели четири милиони евра. Секако, удел во намалениот финансиски резултат имаше и намалената цена за производот на ова акционерско друштво.
Доказ дека „Макстил“ има здрав бизнис се оперативните приходи кои се наплатени минатата година, а кои изнесувале 137,2 милиони евра. Тоа се огромни средства, иако има намалување за 25 проценти во однос на една година претходно, односно 2022 година.
Најголем дел од оперативните приходи се приходи од продажбата, кои тежеле околу 135 милиони евра, при што треба да се има предвид дека опгромниот дел, однпосно дури 120,5 милиони евра се приходи од извоз, односно од продажба во странство. Иако, и тоа е намалување за 26 проценти во однос на истиот период лани. Од продажбите на домашниот пазар, пак, се слеале приходи од 14 милиони евра.
Н.Н.Ф.
