Голем пожар меѓу две кичевски села, пожарот им се заканува на куќите

Голем шумски пожар избувна денеска во зоната меѓу кичевските села Црско Големо и Црско Мало, загрозувајќи ја безбедноста на околните домови и населението. На терен се наоѓа директорот на Центарот за управување со кризи (ЦУК), Мухамед Али, заедно со градоначалникот на Општина Кичево, Фатмир Дехари.

„Веднаш по добиената информација, ја координирав ангажираноста на авионите на Дирекцијата за заштита и спасување, а во акцијата се вклучија и противпожарните единици од Кичево и Демир Хисар, екипите на ЈП ‘Лопушник’, како и локалното население“, информира директорот Мухамед.

Благодарение на брзата интервенција, пожарот е делумно ставен под контрола, но екипите остануваат на терен во состојба на зголемена готовност. Ситуацијата се следи внимателно со цел навремено спречување на негово повторно ширење.

Надлежните апелираат до жителите да бидат претпазливи и да не се движат непотребно во околината каде што огнот сè уште не е целосно изгаснат.