ГОДИНИ ВЕТУВАЊА, НУЛА РЕАЛИЗИРАЊА – СТРУГА БЕЗ НОВ ЗАТВОРЕН ПАЗАР

Струга со години се соочува со стар, запуштен пазар, без основни услови за трговците и граѓаните. Секој пазарен ден се претвора во хаос,меѓу испуканиот бетон и недостигот од хигиена. Иако, решението за оваа состојба беше ветено уште во 2017 година, кога ДУИ во изборената програма најави изградба на нов, затворен пазар како модерно решение што ќе им обезбеди подобри услови на трговците и граѓаните, елиминирајќи ги долгогодишните проблеми со постојниот простор. Денес осум години подоцна тоа ветување сè уште не е реализирано, а градот продолжува да се соочува со истите секојдневни предизвици.

Screenshot од изборната програма 2017-2021 стр.16 (поради тоа што изборната програма не е достапна на македонски јазик ја објавуваме на албански)

Сегашниот пазар е оставен на милост и немилост на времето. Испукан бетон, мувлосани тавани, слаби хигиенски услови и недостиг на организација, тоа е секојдневната слика. Дополнително, сообраќајниот хаос за време на пазарните денови создава проблеми не само за трговците, туку и за жителите кои живеат во близина. Многу граѓани изразуваат разочарување, истакнувајќи дека ова е еден од најголемите урбани проблеми што со години останува без решение.

(Фотографии од актуелниот пазар во Струга)

Наместо да се изгради нов пазар, идејата остана само на хартија,заборавена веднаш по изборите. Ова го засили чувството кај граѓаните дека политичките ветувања се даваат само за да се добијат гласови, а не за да се подобри секојдневниот живот.
Во меѓувреме, приватниот сектор покажа дека сериозните инвестиции се можни. Во текот на 2025 година, во Струга се отвори модерен Retail park кој нуди современи услови и го претвора градот во атрактивна дестинација за купувачите. Овој силен контраст го поставува прашањето: зошто приватните инвеститори можат да реализираат нови проекти, додека јавните институции ги запоставуваат дури и најосновните потреби на граѓаните?
Граѓаните на Струга чекаа предолго. Ветувањето за нов пазар остана неисполнето, а старите проблеми се продлабочуваат секој ден. Ако ваквиот пристап продолжи, Струга ризикува да остане град на неисполнети ветувања а не на ветениот развој.