ГО ТОВАРАТ ЗА УБИСТВО НА ЦИВИЛИ ВО ПРИЗРЕН: Уште еден Србин е обвинет за воени злосторства во Косово
Уште еден Србин е обвинет за воени злосторства во Косово.
Специјалното обвинителство на Косово поднесе обвинение против осомничен за воени злосторства врз цивилното население за време на војната во Косово во 1998-1999 година, јави дописникот на МИА од Приштина.
Обвинителството го обвинува осомничениот М.П., кој има двојно српско и косовско државјанство, за учество во убиството на тројца цивили во населба во Призрен во 1998 година. Обвинителството го товари за кривично дело „воено злосторство врз цивилно население“, казниво со член 142 во врска со член 22 од Кривичниот закон на СФР Југославија, кој бил на сила во тоа време.
„Осомничениот е обвинет дека учествувал во убиството на жртвите Решат Дачај, Бинак Дачај и Фатмир Бојаџиу за време на војната во Косово, во периодот околу 1 септември 1998 година, во околината на населбата „Хоќа Махала“ во Призрен“, се наведува во соопштението објавено синоќа.
Осомничениот, кој е уапсен во септември лани, ќе остане во притвор до нова одлука на судот.
Од крајот на последната војна во Косово, околу 70 лица се осудени за воени злосторства пред локалните и меѓународните судски институции.
Српската полиција пред неколку дена на Мердаре уапси косовски Албанец за воени злосторства.