Го рушат митот: Сè повеќе жени се обучуваат за пожарникарки
Во Македонија сè повеќе се отвора просторот жените да станат пожарникарки, по примерот на поразвиените земји. Десетина жени од Источна Македонија веќе започнаа обуки за приклучување кон доброволните противпожарни друштва, како дел од програмата „И ти можеш да бидеш хероина“.
Тие поминуваат теоретски и практични тренинзи за реагирање при пожари и користење на основна опрема. Меѓу нив е и Танкица Стојанова од Струмица, која вели дека овие обуки се важни за рушење на предрасудите дека пожарникарството е „машка професија“.
Меѓународна поддршка пристигна од британската Операција „Флоријан“ и пожарникарката Ема Синглер од Манчестер, која истакна дека волјата и храброста не зависат од полот и дека бариерите треба постепено да се отстрануваат.
Организацијата на жени од Свети Николе, заедно со националната мрежа на доброволни друштва, ги спроведува обуките. Од ДПД Струмица велат дека жените се подеднакво способни за теренска работа и дека секој обучен волонтер ја зајакнува безбедноста на заедницата.
Иако интересот расте, во професионалните служби засега работи само една жена пожарникарка.
