Го родила на 14 години, па плашејќи се го завела со книшка на тетка му – ДНК-анализата ги откри родителите на починатиот Мемет Камбер
Завршена е ДНК анализата на деветнаесетгодишниот Мемет Кембер, кој неодамна почина, кој не беше заведен во системот, јавува телевизија Телма.
Поминаа три недели од смртта на ова момче. Тој имал извод, имал државјанство, но не и лична карта. Мајката на Мемет чиешто име е наведено во изводот, всушност не е неговата вистинска мајка, туку е негова тетка.
„Биолошката мајка го има родено ова дете на 14 годишна возраст, и ова не е единствен случај, плашејќи се од тоа дали смее или не смее дa го заведе своето дете во документацијата, ја зема книшката од својата золва, и така и е заведено детето. Меѓутоа, во моментот тоа не претставува проблем. Во моментот е проблем на кого да се даде детето, на кого да се предаде телото на детето“, изјавил за Телма, Мухамед Точи, државен секретар во Министерството за правда..
Во моментот, две постапки се извесни. Едната постапка е Јавното обвинителство да даде налог и да може детето да се предаде на биолошките родители. Тие се тука, присутни се и институциите имаат контакти со нив. Мемет Камбер живеел заедно со нив.
Надлежните сега од нив ќе ги побараат и одговорите за прикривање на идентитетот на Камбер. Со тоа, нему му било ускратено правото за здравствена нега и грижа, а сега и за достојно испраќање.
Ако до среда не се најде решение и Мемет Камбер не биде погребан, од невладината „Ромалитико“ најавија протест пред Собранието. Тоа е итно барање, а на маса се и други барања, како што е усвојувањето на потребните законски измени, за пристап до лична карта и други документи, токму за ваквите случаи.
