„Глетката беше страшна, затекнавме тело на столче со прстите на маса, друго потпрено на столб“, сведочи пожарникар!
Судскиот процес за катастрофалниот пожар во дискотеката „Пулс“ продолжи со сведочењето на Драган Апостолов, командир на противпожарната единица во Кочани.
Неговиот исказ ги откри застрашувачките услови со кои се соочиле спасувачките екипи при влезот во објектот каде што животот го загубија 63 лица.
Апостолов пред судот опиша сцена на вистински ужас. И покрај професионалната заштитна опрема, командирот се здобил со изгореници и пликови на рацете само од екстремно високата температура во внатрешноста.
Најголемата концентрација на заглавени и починати млади лица била пронајдена во тесниот ходник веднаш зад влезната врата.
Сведокот опиша три целосно јагленосани тела во позиции кои укажуваат на последните моменти од нивната борба за живот – едното држејќи се за маса, другото потпрено на столб, а третото со рацете кренати нагоре.
Командирот се присети на моментот кога екипите се обидувале да реанимираат девојка, по што медицинско лице само кратко потврдило: „Мртва е“.
Судењето продолжува со сослушување на преживеано девојче, кое треба да даде дополнително светло на настаните од таа кобна ноќ кога Македонија ја зави во црно смртта на 63 млади луѓе.
