ГЕРМАНСКАТА ЕКОНОМИЈА СТАГНИРА: МОРА да се дејствува решително
Германската економија стагнира
Светската економија полека закрепнува од стагнацијата во синџирите на снабдување и поскапувањето на енергенсите, објави Организацијата за економска соработка и развој.
Истовремено, таа оцени дека германската економија стагнира.
Цените на енергијата и вкупната инфлација паѓаат на глобално ниво, тесните грла за снабдување се намалуваат, а финансиската состојба на домаќинствата станува постабилна, објави во средата во Париз ОЕЦД.
Според најновата прогноза на ОЕЦД, годинава се очекува глобален економски раст од 2,7 отсто, а следната година 2,9 отсто. Ова е сè уште значително под десетгодишниот просек пред пандемијата, а патот до силен и одржлив економски раст е сè уште долг.
Германската економија оваа година најверојатно ќе стагнира, додека следната година ќе порасне за 1,3 отсто, соопшти ОЕЦД. Високата инфлација ги намалува приходите и ги топи заштедите и ја задушува личната потрошувачка, која е важен столб на германската економија.
Закрепнувањето на економијата во Германија ќе го зголеми извозот – заостанатите нарачки, кои се многу, се исполнуваат, а проблемите со синџирите на снабдување се олеснуваат.
ОЕЦД предупреди дека креаторите на политиките ширум светот мора да дејствуваат решително со цел да постигнат посилен и поодржлив раст преку мерки на економската и структурната политика.
Сепак, ова ќе биде тешко бидејќи инфлацијата е сè уште премногу цврсто закотвена, задолжувањето е превисоко, а производниот потенцијал е премногу низок.
