Германец и Белгиец снимале голи деца во Хрватска
Германец и Белгиец се уапсени на Истра во Хрватска затоа што снимале голи деца во камп.
Истарската полиција уапси 61-годишен Германец и 57-годишен Белгиец, кои се осомничени дека во одвоени случаи снимале голи деца во градовите Пула и Ровињ.
Полицијата во Пула го товари германскиот државјанин за експлоатација на деца за порнографија, затоа што на 7 јуни околу 19 часот снимил голо дете како се тушира во камп во областа Премантура.
Белгиски државјанин е уапсен од полицијата во Ровињ поради сомнение дека попладнето на 7 јуни со мобилен телефон снимал и фотографирал деца во нудистичкиот камп.
Обезбедувањето брзо го запрело и го задржало додека не дошла полицијата која го привела мажот. Полицајците извршиле претрес во просториите, возилата и мобилните уреди што ги користеле осомничените.
Вакви инциденти се случуваат секоја летна сезона во Хрватска. Најчесто тоа се странски државјани кои фотографираат голи деца со мобилни телефони. Мобилните често им се скриени во чанти и други предмети, пишува Н1 Загреб.
Во 2021 година, имаше случај каде педофили со подводни камери снимале голи деца на хрватскиот брег на Јадранот.
Во 2020 година, Италијанец снимал голи деца со мобилен, а Австриец со камера во часовникот.
