Георгиевски со порака до Касами: Тетово секогаш бил и ќе остане македонски град!
ВМРО-Народна партија на поранешниот премиер Љубчо Георгиевски најави самостоен настап на претстојните локални избори во Општина Тетово, кои ќе се одржат во октомври. Од партијата информираат дека ќе излезат со сопствена советничка листа, како и со кандидат за градоначалник на Тетово.
Во соопштението се наведува дека партијата ќе понуди кандидат со „обединувачки капацитет и визија за модерно Тетово“.
„Им порачуваме на сите Македонци и останатите граѓани на Тетово дека во ВМРО-НП секогаш ќе имаат партнер од доверба кој нема да ги изневери интересите на македонскиот народ во овој дел од Македонија,“ се наведува во партиското соопштение.
Дополнително, упатија порака и до актуелниот градоначалник Билал Касами: „Тетово секогаш бил и ќе остане македонски град.“
Од ВМРО-НП најавија дека, по распишувањето на изборите, ќе организираат свечена промоција на кандидатот за градоначалник и листата за Советот на Општината.
Во меѓувреме, Билал Касами, актуелниот градоначалник и лидер на партијата Движење Беса, која е дел од владејачката коалиција ВЛЕН, веќе ја потврди својата кандидатура за втор мандат.
Одлуките на најголемите македонски партии – ВМРО-ДПМНЕ и СДСМ – да не кандидираат свој градоначалник за Тетово предизвикаа реакција од Сојузот на борците од НОАВМ и граѓани продолжувачи од Тетово. Во својата изјава, тие ја изразија својата длабока загриженост за политичката неактивност во овој дел на државата, оценувајќи ја како занемарување на интересите на македонскиот народ во Тетово.
