Генерали Инвестментс: Преглед на тековните настани кои влијаат врз пазарите на капитал
Компаниите понекогаш стануваат свесни за ризиците што ги преземаат откако ќе се влоши ситуацијата на пазарот, што беше сликовито опишано од Ворен Бафет на почетокот на кризата од 2008 година со изреката „само кога ќе се појави осека, можеме да видиме кој плива гол“. Минатата недела на пазарот беа пронајдени тројца нудисти.
Последиците од наглото зголемување на каматните стапки се почувствуваа во банкарскиот сектор во САД, што ги дестабилизираше финансиските пазари. За една недела дури три банки кои беа присутни во областа на криптовалутите и ризичниот капитал пропаднаа поради неликвидност или несолвентност.
Бидејќи банкарскиот сектор е поврзан, сè уште е свеж споменот од 2008 година, кога колапсот на Lehman Brothers доведе до криза на ликвидноста во целиот финансиски систем. Последниве денови, банкарските берзански индекси ширум светот значително се лизнаа. Но, падовите беа особено изразени кај помалите банки кои работат во тесен и специфичен сегмент од пазарот и не припаѓаат на системски важните банки.
Европската централна банка и ФЕД се состануваат оваа и следната недела. Ќе биде интересно да се види како централните банкари ќе реагираат на неодамнешните настани. Аргументите на оние кои предупредуваат на опасноста од присилното зголемување на каматите секако добија на тежина последните денови, па наскоро ќе видиме дали овој настан носи долгорочни промени (пресврт во политиката на покачување на каматните стапки) или ќе биде само споредна епизода.
