Газдите исчезнале, платите ги нема: Работници од штипска конфекција пред заклучени врати
Повеќе од 50 работници од една штипска конфекција утрово останаа пред заклучени врати, наместо да се вратат на работа по летниот одмор.
Според нивните сведочења, сопствениците на фирмата – државјани на Хрватска и Германија – исчезнале без никакво известување, оставајќи ги вработените без исплатени плати и без никаков контакт.
На влезната врата било залепено кратко соопштение со кое вработените се упатуваат самостојно да се пријават во Агенцијата за вработување. Во пораката нема никакви информации за исплата на заостанатите примања или за идниот статус на компанијата.
Работниците велат дека ниту сопствениците, ниту директорката се достапни – не одговараат на телефонски повици и не се појавуваат во просториите на фирмата.
„Газдите ни се Хрват и Германец, а ние немаме кому да се обратиме. На вратата само оставиле известување до кога ни трае договорот. Ние платата ја бараме од нив и од директорката, но нив никаде ги нема,“ велат револтирани работнички.
Случајот предизвика големо незадоволство кај вработените, кои најавуваат дека ќе бараат институциите да се вклучат за да им бидат заштитени правата и исплатени заостанатите примања.
