Газдата на „Дурмо Турс“ бара одложување на казната поради операција, откако неговиот соработник избега
Правдата за трагедијата кај Ласкарци е повторно доведена под прашање. Дурмиш Белули, сопственикот на компанијата „Дурмо Турс“ кој е осуден на десетгодишна затворска казна, во последен момент побара ново одложување на издржувањето на казната, наведувајќи здравствени причини. Ова барање доаѓа во исклучително чувствителен момент, откако неговиот осуден соработник, кој користеше ист основ за одложување, веќе е во бегство.
Белули, кој денеска требаше да се јави зад решетки за да ја започне својата казна од десет години затвор, поднел барање за одложување на извршувањето на казната поради закажана операција.
Барањето на Дурмиш Белули автоматски ја отвора дилемата за одговорноста на правосудните органи, имајќи го предвид неодамнешниот преседан во истиот случај.
Ремзи Мифтари, шефот на возниот парк на „Дурмо Турс“, кој исто така е осуден во случајот „Ласкарци“, претходно побара одложување на издржувањето на казната. Како причина тој навел операција на кила на тестиси.
Судот го прифатил неговото барање, но Мифтари не се вратил. Тој во меѓувреме побегнал од државата и сега се бара со меѓународна потерница.
Овој факт, кој претставува директно избегнување на правдата од страна на осудено лице, го става под силен јавен притисок Судот да биде максимално внимателен при разгледувањето на новото барање на сопственикот на компанијата.
Трагедијата кај Ласкарци, во која животот го загубија 16 лица, е еден од најголемите случаи во македонското судство, а осудителните пресуди донесени по повеќегодишен процес конечно требаше да почнат да се спроведуваат. Новото одложување од страна на првообвинетиот го одлага конечниот епилог на правната разрешница.
Судот во наредните денови треба да донесе одлука дали ќе го прифати барањето на Белули за одложување, или ќе нареди негово итно спроведување во затвор.
