ГАШИ САКА ДА ЈА СМЕНИ ПРАКТИКАТА ЗА НОСЕЊЕ ЗАКОНИ ПО СКРАТЕНА ПОСТАПКА Во јануари Собранието ќе донесе календар за работа
Собранието треба на некој начин да биде предводник на ова премостување на вредносниот систем. Треба да направиме и вредносна транзиција во општеството. Да почнеме да зборуваме за добрите работи, за почитта, за љубовта, за позитивните работи во државата, за помош, солидарност, за емпатијата, за етиката, за моралот, нашите семејни вредности, вели во интервју за МИА, претседателот на собранието Африм Гаши.
Тој се залага, собранието да не носи закони по скратена постапкa, бидејќи, како што вели, тоа ја намалува можноста јавноста и експертите да дадат свое мислење.
Според него, едно од решенијата за намалување на бројот на закони по скратена постапка е донесување календар за работа на Собранието со кој ќе се утврдат датумите на пленарните седници. Тоа, вели тој, ќе ѝ помогне на владата да планира кога ќе ги испраќа законите до Собранието.
Календарот е планирано да се донесе во јануари.
-Ќе предложиме на координација календар на активности и на пленарни седници по кои ќе комуницираме со Владата, и тие ќе знаат точно кои месеци, кои денови точно ние планираме пленарни седници. Кога сакаат да им се донесе закон, ќе знаат точно кога да го пратат. И ќе треба сензибилизација. Јас мислам дека не е работата само до Владата. Имаме, за жал, неквалитетна или недобра култура во однос на меѓуинституционалната работа и Собрание. За 34, 35 години така се научени побрзо да ги завршат работите. Мислат дека Собранието треба да биде гласачка машинерија за носење на закони. Тој пристап мора да се смени вели Гаши.
Законите, додава тој, треба да се донесат во редовна постапка, затоа што така ќе има можност и за поголема промоција и вклученост на експертската јавност.
За Гаши, не е важно дали тој ќе го заврши мандатот во собранието или ќе биде заменет.
– Секој ден го работам како да е последниот ден како претседател на Собрание. Мене ми е многу битно секој ден да го работам чесно, да дадам сè од себе и да имам мирна и чиста совест кога ќе заспијам таа ноќ. Утредента што ќе се случи, за работи кои не зависат од мене, а знаете, политиката во сржта нејзина се состои од компромиси. Може сè да се случи, и додека зборуваме ние може да има промени. Така што, не се оптоварувам со тој дел, не е битно јас кај ќе бидам. Битно ми е додека јас сум на таа функција, во таа улога, да дадам сè од себе таа функција да биде издигната, надоградена, достоинствена и секој нареден кој ќе дојде после мене, да му биде полесно, да имаме подобра институција која ќе биде во служба на граѓаните – вели Гаши.
Во пораката што ја упатува до пратениците и до граѓаните во пресрет на новата година, Гаши посочува оти очекува да се зголеми политичката култура и взаемната почит. Да почнеме, потенцира тој, да размислуваме за најбитните човечки особини за коишто сме учеле уште од детството, како што се почитта, респектот, толеранцијата, љубовта која треба да ја покажеме кон нашите колеги и другите луѓе со кои работиме заедно. Тие треба да преовладуваат.
-Премногу негативна енергија имаме, контаминирано општество создаваме. И Собранието треба на некој начин да биде предводник на ова премостување на вредносниот систем. Треба да направиме и вредносна транзиција во општеството. Да почнеме да зборуваме за добрите работи, за почита, за љубовта, за позитивните работи во државата, за помош, солидарност, за емпатијата, за етиката, за моралот, нашите семејни вредности – вели Гаши.
.
