Галуп: Половина од Американците се плашат за парите на нивните банкарски сметки
Речиси половина од Американците стравуваат за парите на нивните банкарски сметки поради актуелните превирања во американскиот банкарски систем, како и финансиската криза во 2008 година, покажува истражувањето на Галуп.
Вкупно 48 отсто од испитаниците стравуваат за своите пари, вклучително и 19 отсто кои се „многу загрижени“, според анкетата на Галуп.
Околу 30 отсто од испитаниците „не се премногу загрижени“, а 20 отсто „воопшто не се загрижени“ за парите што ги депонирале на нивните банкарски сметки.
Анкетата покажа јаз меѓу испитаниците со високо образование и оние без диплома. Дури 54 отсто од Американците без диплома и 36 отсто од оние со диплома изразиле загриженост за парите на нивната банкарска сметка.
Стравот од губење готовински депозити го мачи приближно секој друг испитаник кој живее во домаќинство со годишен приход до 100 илјади долари, пренесуваат медиумите во соседството.
Во категоријата со повисоки примања загриженост изразиле 40 отсто од нив.
Галуп шпекулира дека граѓаните со пониски приходи и оние без факултетска диплома може да бидат загрижени бидејќи не знаат дека депозитите до 250.000 долари се осигурани од Федералната агенција за осигурување на депозити (FDIC).
Друга можна причина е можеби незадоволството од актуелната администрација или состојбата на американската економија, забележуваат тие.
Галуп последен пат ја измери загриженоста на Американците за парите на нивните банкарски сметки во 2008 година, во екот на финансиската криза, со многу слични резултати.
Така, во истражувањето спроведено во септември 2008 година, 45 отсто од Американците изјавиле дека се плашат за безбедноста на готовинските депозити.
Тековната анкета беше спроведена од 3 до 25 април, по колапсот на Силиконската долина банка и Сигнач банка и пред колапсот на Првата Република.
