Г.г. Стефан: Храмот „Свети Константин и Елена“ е радост за сите сетила – со него добиваме место каде што земјата се среќава со небото, а времето преминува во вечност
Со изградбата на овој семакедонски и сеправославен храм, постигнавме дело кое нѐ надминува. Новиот молитвен дом со својата извонредна убавина е сведоштво дека нашиот народ останува црквоградител, а Македонија земја храм, земја манастир и земја крст, истакна архиепископот Охридски и Македонски г. г. Стефан на денешното осветување на црквата „Свети Константин и Елена“ во центарот на Скопје.
Церемонијата започна утринава во 8:30 часот со ѕвонење на камбаните и траеше околу три часа. На свечениот чин присуствуваа голем број верници, претставници на МПЦ, премиерот Христијан Мицкоски, министри, лидери на политички партии, градоначалници, академици, професори, стопанственици, како и монашкиот клир.
„Овој храм е радост за сите сетила. Со него добиваме место каде што земјата се среќава со небото, а времето преминува во вечност. Светите рамноапостоли Константин и Елена, на кои е посветен овој молитвен дом, заслужуваат ваква убавина. Но убавината на храмот не е цел сама по себе – таа е водич кон Бог. Архитектурата, фреските и иконостасот нѐ потсетуваат дека молитвениот дом постои за да ги издигнуваме нашите срца кон небесните височини. Храмовите не се градат за човечка слава, туку за приближување кон Бога“, нагласи архиепископот.
Тој додаде дека црквата е местото каде што се крштеваме и венчаваме, каде се замонашуваме и ракополагаме, но најмногу од сè – местото каде што се служи светата литургија.
„Ова здание ќе остане немо ако не се исполнува со живи души. Најубав храм е оној што е полн со верен народ, а денес верувам дека токму овој е таков. Да продолжиме редовно да доаѓаме, да се молиме и да благодариме на Бога. Да станеме храмови што не можат да се урнат – храмови на вечниот живот“, порача г. г. Стефан.
Присутните верници со голема возбуда ја следеа церемонијата и имаа можност да запалат свеќи во новоосветениот храм. „Ова е голем чин. По толку години конечно се изгради оваа црква. Сакаме да ни донесе здравје, мир и љубов“, рече еден од верниците.
По завршувањето на свеченоста, МПЦ соопшти дека му доделува Орден на Свети Климент Охридски од прв ред на ктиторот Сашо Костовски и неговото семејство за финансиската поддршка со која се овозможи довршување на храмот.
Осветувањето верниците можеа да го следат и на два големи видео-бима поставени пред храмот, а целата церемонија беше снимана и со дрон.
Меѓу присутните беа и министрите Панче Тошковски, Гордана Димитриеска-Кочоска, Стефан Андоновски и Весна Јаневска, како и лидерот на СДСМ Венко Филипче.
Изградбата на црквата започна во 2012 година, а заврши по 13 години. Во 2024 година работите беа интензивирани, со што беше комплетирано внатрешното уредување, надворешноста и околниот простор.
