ФЗО и УЈП извршија заеднички контроли – утврдени неправилности кај 23 од 49 здравствени установи
Фондот за здравствено осигурување (ФЗО) и Управата за јавни приходи (УЈП) извршија контроли во 49 приватни здравствени установи и кај матични гинеколози, при што кај 26 од нив не се утврдени никакви неправилности, додека кај 23 установи биле констатирани одредени пропусти.
Генералниот директор на ФЗО, Сашо Клековски, на денешната прес-конференција истакна дека ФЗО има склучено договори со вкупно 149 приватни здравствени установи за примарна здравствена заштита во дејноста гинекологија. „Во ноември 2025 година извршивме заеднички контроли со УЈП во 49 ПЗУ, што претставува 33% од вкупниот број договори, поради зачестени претставки од осигуреници. Последна заедничка контрола беше направена во 2012 година“, појасни Клековски.
Целта на контролите била да се провери придржувањето кон договорните обврски, особено дека прегледите, дијагностичките и терапевтските процедури кај избраниот лекар не смеат да се наплаќаат од осигурените лица.
Клучните наоди покажале: неправилности само од ФЗО кај 3 установи, само од УЈП кај 11, а кај 9 установи констатирани се пропусти и од двете институции. Главните неправилности утврдени од ФЗО се наплата на дополнителни средства од осигурени лица (кај 8 ПЗУ) и неуредна евиденција (кај 5 ПЗУ). Од страна на УЈП, неправилности поврзани со фискализација биле утврдени кај 20 установи, со изречени глоби.
Директорката на УЈП, Елена Петрова, појасни дека во рамки на заедничките контроли биле опфатени 46 приватни гинеколози, при што кај 16 установи (35%) биле утврдени неправилности во евидентирањето на готовинскиот промет, со веднаш изречени прекршочни санкции.
„Иако здравствените услуги се ослободени од ДДВ, неевидентирањето на приходите остава простор за нивно користење како неоданочени лични примања и ги потхранува сивата економија. Оваа пракса создава нефер предност на сметка на оние што работат законски и води до загуби на јавни приходи. УЈП нема да толерира вакво однесување и ќе продолжи со засилени и координирани контроли се додека не се постигне трајна промена во евидентирањето“, нагласи Петрова.
