Францускиот Сенат изгласа зголемување на старосната граница за пензионирање од 62 на 64 години
Францускиот Сенат, во кој доминира десничарската опозиција, синоќа гласаше за зголемување на старосната граница за пензионирање од 62 на 64 години, клучна одредба од контроверзната реформа што францускиот претседател Емануел Макрон сака да ја спроведе.
Според АФП, зеленото светло на Сенатот за зголемување на старосната граница за пензионирање е победа за извршната власт, која сака да го забрза усвојувањето на пензиската реформа во парламентот, но во исто време да избегне користење на член од уставот кој дозволува усвојување на закон без гласање во парламентот. „Мило ми е што дебатите го овозможија ова гласање“, твитна премиерката Елизабет Борне, која може да смета на гласовите на Републиканците.
Во Националното собрание, каде владата има релативно мнозинство, воопшто не можеше да се разговара за зголемување на старосната граница за пензионирање поради опозицијата, како и поради многу напорниот распоред на дебати што го постави власта.
Владата се надева дека Сенатот ќе гласа за дел од законодавството до крајниот рок што го одреди до недела. Во овој случај, ќе се состане мешовит комитет од сенатори и пратеници во обид да постигне договор за целата пензиска реформа, која потоа би можела да биде усвоена на 16 март.
Од првиот ден, реформата ги вознемири синдикатите, кои со неколку штрајкови и демонстрации од 19 јануари изведоа милиони Французи на улица. Последните масовни протести против пензиската реформа се одржаа во вторник во Франција, а се најавуваат следните за сабота.
И покрај протестите, владата инсистира на реформата, велејќи дека без неа пензискиот систем ќе пропадне. Пензиската реформа беше и едно од централните предизборни ветувања на претседателот Емануел Макрон. Тие се обидоа да ги ублажат критиките со ветување дека ќе ја зголемат минималната загарантирана пензија на 1.200 евра, како и надоместоците за пензионерите со здравствени проблеми и за оние кои извршуваат физички тешки работни задачи. Опозицијата обвинува дека се обични „бонбони“ без никаков реален ефект.
