(ФОТО) Снежна бура ја парализираше Грција: затворени училишта и продавници, спасувачите евакуираа заглавени луѓе
Поради обилните снежни врнежи и големиот пад на температурата во Грција, училиштата, градинките и продавниците во Атина се затворени, сообраќајот е отежнат низ целата земја, а многу јавни служби и бизниси се префрлаат на работа на далечина.
Некои метро станици во близина на меѓународниот аеродром во Атина исто така беа затворени, а железничката линија за Солун во северна Грција беше суспендирана.
Спасувачките и противпожарните бригади евакуираа четири лица чии автомобили се заглавија во снегот во атинското предградие Аспропиргос.
Властите ги повикаа граѓаните да избегнуваат несуштински патувања, јави државната ТВ ЕРТ, најавувајќи дека студеното време ќе трае до утре.
Поради снежната бура наречена „Барбара“ која од саботата ја зафати Грција, со силен ветер и снег, создаде проблеми во повеќе делови на земјата.
Надлежните одлучија денеска во Атина да бидат затворени градинките, основните и средните училишта, јавната администрација работи од дома, продавниците во северниот дел на градот се затворени, а преку бројот 112 за итни случаи била упатена препорака до граѓаните да ги ограничат нивните движења.
Проблеми имало и на автопатот кон Солун, што неколку пати бил затворан и повторно отворен, додека пак поради силниот ветер, постои забрана за пловидба од сите атински пристаништа.
Фото: EPA-EFE/ALEXANDROS BELTES /PANTELIS SAITAS /ALEXANDROS VLACHOS
