ФОТО Скопјанка нападната од глутница кучиња на кејот на Вардар
Скопјанката Сања Николовска Најдовска, синоќа на социјалните мрежи сподели вознемирувачко сведоштво за напад од глутница кучиња на скопскиот кеј, што го преживеала рано наутро на 3 февруари.
Според нејзината објава, инцидентот се случил околу 4:30 часот додека излегла наутро да трча. Таа раскажува дека на дел од кејот, во близина на Палас, најпрво ѝ се приближиле неколку кучиња, кои почнале да лаат, а набрзо им се придружиле уште десетина.
„Се обидов да ги избркам со викање, но не успеав. Едно од нив ме гризна, а другите ми го попречија патот. Во паника решив да трчам назад. Трчав и ме гризеа околу пет минути, сè додека не се сопнав и паднав“, наведува таа во објавата.
Жената претрпела угризи на седум места по телото, по што случајот го пријавила во полиција. По интервенцијата на службите, таа била пренесена на Ургентен центар и примила тетанус вакцина во болницата „8 Септември“.
Во својата објава, Николовска Најдовска апелира институциите системски да го решат проблемот со бездомните кучиња, истакнувајќи дека по инцидентот се плаши да се движи сама низ градот. Објавата е адресирана до Агенцијата за храна и ветеринарство, Град Скопје, ЈП „Лајка“ и општините Центар и Карпош, со порака вакви случаи да не се повторуваат.
