ФОТО Пајаци креваат непрописно паркирани возила по серијата наши текстови
По серијата текстови на 4NEWS за узурпацијата на јавниот простор пред Музејот на Град Скопје, каде со месеци службени и приватни возила беа непрописно паркирани на место наменето за туристички автобуси, денеска конечно се појави реакција од надлежните – „пајаци“ почнаа да ги подигнуваат возилата.
Нашиот фоторепортер забележа како се подигнуваат неколку возила кои со недели беа дел од хаосот на оваа локација. Иако ова е позитивен чекор, на терен ситуацијата сè уште не е целосно решена. Дел од возилата повторно се паркирани, а сообраќајниот знак за забрана на сопирање и запирање – кој до неодамна стоеше на тоа место – е сè уште турнат и оставен на страна.
Интересен детал денеска е и тоа што пред Музејот не беа паркирани службените возила поврзани со Министерството за енергетика бидејќи министерката за енергетика е на службено патување, па најверојатно токму поради тоа недостасуваа и возилата кои редовно беа забележувани на оваа локација.
Граѓаните ни испраќаат нови фотографии и информации, револтирани што на локација каде буквално пред очи на полицијата се врши секојдневно прекршување на сообраќајните правила, потребна беше јавна реакција за да се преземе било каква мерка.
4NEWS ќе продолжи да го следи развојот на овој случај и да известува за тоа дали институциите ќе покажат доследност или ова ќе биде само еднократна акција за „смирување на топката“.
