ФОТО Објавена е наводна порака за помош од убиената Росица од Велес испратена до министерот Тошковски
На социјалната мрежа Фејсбук вечерва се појави и масовно се споделува вознемирувачка фотографија од СМС порака, за која се тврди дека е последен, очаен повик за помош, наводно испратен од неодамна убиената Росица К. од Велес до министерот за внатрешни работи, Панче Тошковски. Автентичноста на пораката не е официјално потврдена, но нејзината содржина, во која се наведени и точни броеви на судски предмети, предизвика лавина од реакции и гнев во јавноста.
Нашата редакција го потврдува телефонскиот број кој е прикажан на фотографијата дека станува збор за личниот мобилен број на Министерот за внатрешни работи.
Во пораката, наводно испратена денеска во 16:08 часот, стои:
„Се надевам дека пишувам на правилно место и дека конечно некој во оваа држава ќе отвори уши и очи за мојата безизлезна ситуација… Човекот кој од декември па наваму ме демне, ме тепа и нанесува друг вид на насиство, силува, прогонува и последно пред 5 дена ми ја запали колата е сеуште на слобода!“.
Најшокантниот дел од пораката содржи тврдење за директен пропуст на институциите:
„Вратен му е пасошот од МВР и во моментов слетува во Берлин“.
Во текстот се наведени и броеви на предмети во ОЈО Скопје и Основниот суд Велес, со име на јавен обвинител, што се поклопува со веќе објавените информации за историјата на насилство што го трпела жртвата. Пораката завршува со зборовите: „Очајно ве молам за помош“.
Оваа објава доаѓа само една недела по трагедијата во Велес и по обелоденувањето на информациите дека убиената Росица со месеци пријавувала насилство, вклучително и палење на автомобил, како и дека убиецот добил само условна казна за насилство пет дена пред да го изврши двојното убиство и самоубиство. Се очекува официјална реакција од Министерството за внатрешни работи во врска со автентичноста и содржината на оваа порака.
