ФОТО Лустерот кој го преживеа скопскиот земјотрес
Оваа фотографија е направена еден ден по земјотресот во Скопје 1963 година, кога гламурозниот лустер во тогашниот Офицерскиот дом во Скопје, остана да виси, додека повеќето ѕидови на тој грандиозен објект беа урнати.
Сега лустерот се наоѓа во Офицерскиот дом во Битола.
Кристалниот лустер Офицерскиот дом од Битола го наследи од домот во Скопје во 1973 година, десет години по земјотресот.
Седумдесет и две годишниот Будимир Костојчиновски, поранешен електроинсталатер во АРМ е битолчанецот, кој пред цели 37 години го направи украсниот и луксузен лустер во Офицерскиот дом. Трогнат од она што се случува со еден од најубавите споменици на културата на Балканот, Костојчиновски, кого битолчани го именуваат само како Будо, ја раскажува приказната за лустерот.
„Домот беше фантазија. Нема друг збор за таа убавина. Се сеќавам како да беше сега, пролет, мај. Со војнички сандаци од скопскиот отпад во Битола стасаа еден куп монистра, кристали, фигури од стакленца. Тогашниот началник на домот на АРМ, Ристо Дамјановски, ме повика, кажа дека има делови од двата лустера од урнатиот Офицерски дом во Скопје и побара да направам нешто. Зададената задача не беше лесна. Зедов напомош неколку војничиња од гарнизонот и повеќе од еден месец, секое попладне, откако ќе завршев со работните обврски, работев на лустерот. Направивме нешто прекрасно. Никого не оставивме рамнодушен, иако лустерот не беше сосема ист како оној во Скопје“, раскажува мајстор Будо.
