ФОТО Камерата во Тетово покриена со платно е фотографија генерирана со AI
Фотографија наводно направена во Тетово, на која се гледа сообраќајна камера од системот „Безбеден град“ покриена со парче платно, предизвика вирално ширење и коментари на социјалните мрежи. Намерата зад ваквиот чин, како што се претпоставуваше, била да се избегнат казни за сообраќајни прекршоци.
Иницијалната објава укажуваше на наводен обид за манипулација со безбедносниот систем. Во неа се тврдеше дека непознато лице физички го блокирало уредот со цел да оневозможи снимање на прекршоци, наместо да ги почитува сообраќајните правила. Оваа вест брзо се прошири, предизвикувајќи реакции во јавноста.
Од СВР Тетово за 4news.mk категорично ги демантираат ваквите наводи, и велат дека се работи за компјутерски генерирана слика.
„Во СВР Тетово не е регистриран ваков настан, ниту пак е утврдено какво било оштетување или попречување на камерите на терен. Извршените проверки укажуваат дека станува збор за компјутерски генерирана слика (AI) или манипулирана фотографија која не соодветствува со реалната состојба. СВР Тетово апелира до граѓаните да не наседнуваат на вакви дезинформации кои имаат за цел да ја вознемират јавноста или да ја нарушат довербата во безбедносниот систем“, велат од СВР Тетово за 4news.mk
