ФОТО Еве како се одвива судењето за трагедијата во Пулс

Во специјалната судница во Идризово денеска продолжува првото рочиште за една од најтрагичните несреќи во поновата историја – пожарот во кочанскиот ноќен клуб „Пулс“, во кој на 16 март 2025 година загинаа 63 лица, меѓу кои и шест деца.

Судницата е целосно исполнета, а атмосферата е напната и тешка, особено со оглед на присуството на родителите на загинатите, обвинетите и бројните сведоци.

Судијката Дијана Груевска Илиевска на самиот почеток постави строги правила за текот на процесот, барајќи дисциплина и предупредувајќи дека секое непотребно барање за одлагање ќе биде санкционирано.

Таа истакна дека судот е подготвен да обезбеди редовно, транспарентно и професионално судење.

Обвинетите, кои се вкупно 34 физички и 3 правни лица, денеска се присутни во судницата под зголемено обезбедување.

Меѓу нив се поранешни сопственици и менаџери на клубот, лица од обезбедувањето, поранешни градоначалници и општински инспектори, како и поранешни директори на државни институции и претставници на Министерството за економија.

Се очекува обвинителството да го претстави воведниот дел од доказите, а во следните рочишта да започне сослушувањето на над 200 сведоци.

Родителите на загинатите ги следат случувањата со видлива тага и тензија, некои држејќи фотографии од своите деца.

Дел од нив истакнаа дека очекуваат „правда по секоја цена“ и дека нема да дозволат процесот да се развлекува.