Формиран предмет во Уставниот суд за оспорување на Протоколот од меѓувладината комисија со Бугарија

Уставниот суд соопшти дека е формиран предмет УЗ.44/2025, по иницијатива на Лилјана Поповска, во кој се оспорува Протоколот од вториот состанок на Заедничката меѓувладина комисија со Бугарија, потпишан на 17 јули 2022 година во Софија.

Во моментов е во тек претходна постапка, во рамки на која се прибираат и испитуваат податоците и известувањата потребни за донесување на одлука.

Според иницијативата, Протоколот го прекршува член 8 став 1 алинеја 1, 2 и 11 од Уставот и има несоодветна форма и содржина, излегувајќи надвор од рамките на правен акт што обработува еден член од меѓудржавен договор. Подносителката тврди дека документот произведува штетни последици врз идентитетските прашања за македонскиот народ, јазик и држава.

Во иницијативата се наведува дека Протоколот не е ратификуван од Собранието, ниту е објавен во „Службен весник“ во предвидениот рок, што, според Поповска, е во спротивност со Уставот и со членовите 6–16, 19, 20 и 26 од Законот за склучување, ратификација и извршување на меѓународни договори. Таа посочува и на непочитување на процедурите за негово договарање, усвојување од Владата и потпишување.

Подносителката бара поништување на Протоколот, повикувајќи се и на Виенската конвенција за договорното право од 1969 година, која овозможува поништување на договори спротивни на императивните норми на меѓународното право.

Во документот се истакнува дека Протоколот не е полноправен акт потврден од Парламентот, туку останува само записник од состанок на меѓувладина комисија. Поповска дополнително посочува дека за разлика од, како што ја оценува, нетранспарентната постапка во Северна Македонија, бугарската собраниска комисија за текстот на Протоколот расправала уште на 23 јуни 2022 година, а ден подоцна го усвоила како дел од целиот пакет на Францускиот предлог за почеток на преговорите со Скопје.