ФОЛКСВАГЕН НЕ СЕ ОТКАЖУВА ОД БЕНЗИНЦИТЕ – Развиваат нова генерација мотори
Покрај тоа што челниците на Volkswagen неодамна ја критикуваа новата регулатива за е-горивата, и повторија дека нивниот пат е електричен и дека оваа компанија целосно ќе се префрли на електрична енергија веќе во 2033 година, тие се уште не се откажуваат од развојот на нови бензински мотори. Сепак, за оваа „валкана“ работа ќе биде задолжена Škoda.
Иако во последните месеци речиси сите вести од Фолксваген се поврзани со електрификацијата, малку срамежливо, во јавноста протекоа информации за друга област која сè уште го храни вториот по големина производител на автомобили.
Групацијата VW можеби се оддалечи од бензинските и дизел моторите, но тоа не значи дека не смета на нив. Како што покажува најновото соопштение на Škoda, чешката марка доби задача да започне со развој на нова генерација мотори за целата групација VW.
Станува збор за серијата мотори EA211, бензински агрегати со три и четири цилиндри, кои се вградени во педесетина модели на VW Group. Компанијата од Млада Болеслав вработува 150 работници во одделот за технички развој кои исклучиво ќе работат на мотори со внатрешно согорување.
Позната е и целта, а тоа е производство на уште помоќни мали мотори, кои помалку ќе загадуваат. Погодувате, станува збор за имплементација на стандардот Еуро 7, поради што се вели дека автомобилите значително ќе поскапат. Дури се споменува дека поради нормата Еуро 7, од пазарот ќе исчезнат помалите, поевтини модели.
Како што пренесува Index.hr, Volkswagen ја претстави генерацијата на мотори EA211 во 2011 година, а во понуда се бројни верзии, од 1.0 MPI до 1.5 TSI мотори, со моќност од 48 до 115 kW.
Фото: EPA-EFE/Filip Singer
