Фински „Модирум“ презеде македонската ИТ компанија со 125 вработени
Финскиот технолошки гигант „Модирум“ објави дека стекнува мнозински удел во софтверска компанија ITgma, една од најголемите во ИТ-секторот како дејност во Македонија.
„ИТгма“ е фирма за компјутерски консалтинг дејности во сопственост на четворица Македонци. Станува збор за друштвото ИТГМА ДОО чии сопственици се: Дејан Гичевски, Сашко Целаковски, Ристо Колев и Филип Петков.
„Модирум, водечка компанија за технологија и платформи посветена на иновациите и растот, со гордост го објавува своето стекнување на мнозинскиот удел во ITgma, еден од водечките даватели на софтвер и ИТ услуги во Југоисточна Европа. Овој стратешки потег претставува значајна пресвртница за Модирум бидејќи стартува платформа низ деловните сектори како што се телекомуникациите,енергијата и финансиите“, соопшти купувачот.
– Модирум го претставува идеалниот партнер и платформа за нашата траекторија на раст. Со заеднички вредности и високо мотивирачка мисија, ние сме посветени да обезбедиме органски и неоргански раст на Modirum. Тимот на ITgma од над 125 специјалисти, кои ги прошируваат тековите на приходите и профитабилните операции претежно во Европа и Блискиот Исток, е посветен на испорака на вредност. Заедно, имаме за цел да напредуваме како вистинска компанија за длабока технологија, изјави Филип Петков, управен директор на ИТгма.
Тој додаде дека преземањето ќе значи и заедничко давање на услуги управувани од вештачката интелигенција.
