Финалето меѓу Алкалоид и АЕК не се одигра – двете страни со меѓусебни обвинувања
Очекуваното финале меѓу РК Алкалоид и РК АЕК Атина во СЦ „Борис Трајковски“ заврши неславно – натпреварот воопшто не се одигра. Додека трибините беа преполни и македонската публика подготвена за голема ракометна вечер, гостинскиот тим од Атина не се појави на теренот.
Од РК Алкалоид обвинија дека одлуката натпреварот да не се одигра не била нивна вина, туку резултат на одбивањето на АЕК да настапи. Клубот информира дека останува во постојана комуникација со Европската ракометна федерација (ЕХФ) и најави дека навремено ќе ја информира јавноста за исходот од овој случај.
„Огромна благодарност до сите навивачи кои вечерва беа со нас. Жално е што не по наша вина не дојде до одигрување на финалето. Очекуваме одлука од ЕХФ,“ се вели во официјалното соопштение на Алкалоид.
Од другата страна, АЕК преку своите официјални канали потврди дека одлуката да не излезат на терен била, како што ја нарекоа, „тешка, но принудна“. Според нив, причината е тоа што дел од нивните навивачи не биле пуштени да ја преминат границата и не им било дозволено да присуствуваат на натпреварот, иако, како што тврдат, тоа било договорено на утринскиот безбедносен состанок.
„АЕК значи чест, морал и семејство. Нашата администрација едногласно донесе одлука да не играме кога не се почитува нашата поддршка – навивачите,“ стои во нивната објава.
Ситуацијата доби сериозен меѓународен карактер, а се очекува ЕХФ да донесе конечна одлука дали и кога ќе се одигра финалето, и дали ќе следуваат санкции за некоја од страните.
Публиката која со нетрпение го очекуваше натпреварот си замина разочарана, а љубителите на ракометот останаа без одговор на прашањето – кој е вистинскиот победник.
