Филипче бара посебна Анкетна комисија за трагедијата во Кочани: „Тоа е барање на родителите“
Претседателот на СДСМ, д-р Венко Филипче, изјави дека неговата партија ќе ги поддржи иницијативите за формирање две анкетни комисии во Собранието, вклучително и посебна комисија која ќе се фокусира исклучиво на трагедијата во Кочани.
Филипче потенцира дека постои морална и општествена обврска да се оформи одделна Анкетна комисија која ќе ја истражи оваа несреќа, нагласувајќи дека таквото барање доаѓа директно од родителите на загинатите и повредените деца.
„Нашиот став е дека ќе ги поддржиме двете анкетни комисии. Едната предложена од владеачкото мнозинство, која се однесува на сите трагедии во минатото, но сметам дека имаме обврска да организираме и посебна Анкетна комисија само за трагедијата во Кочани“, изјави Филипче.
Тој упати апел до сите пратеници да го поддржат формирањето на оваа комисија, посочувајќи дека гласот на семејствата мора да биде слушнат во Собранието.
„Мора да имаме одговорност пред општеството и државата. Тоа е пред сè на барање на родителите. Апелирам сите пратеници да го поддржат формирањето на комисија само за трагедијата во Кочани“, нагласи Филипче.
Во однос на иницијативата на владејачката коалиција за поширока Анкетна комисија, Филипче истакна дека и таа ќе биде поддржана од СДСМ, додавајќи дека експертите треба да ги земат предвид сите правни аспекти, вклучително и тоа дали во одредени случаи се водат или завршиле судски процеси.
„Имаме морална обврска пред сите кои го бараат ова од нас. Очекувам од сите пратеници да ја поддржат Анкетната комисија за несреќата во Кочани, како што и ние ќе ја поддржиме другата комисија предложена од владејачкото мнозинство“, додаде Филипче.
