ФАКТОР НА ДЕНОТ: Ако се замрзне цената на лебот, пекарите најавуваат затворање на погоните
АКО ВЛАСТА ЈА ЗАМРЗНЕ ЦЕНАТА НА ЛЕБОТ, ПЕКАРИТЕ ЌЕ ЗАТВОРАТ
Пекарите најавија затворање на погоните и прекин на производството на леб првиот ден по објавата на одлуката за замрзнување на цената на лебот во Службен весник.
Ова го соопшти Горан Малишиќ, претседател на групација за мелничко-пекарската индустрија при Стопанската комора на Македонија по денешната средба на членките на групацијата на која како што беше потенцирано едногласно била донесена одлуката за престанок со работа.
НАЈГОЛЕМАТА БРУТО ПЛАТА Е 166.000 ЕВРА МЕСЕЧНО
Скопјанец ја имал највисоката годишна буто плата во текот на 2021 година во износ од 122,3 милиони денари. Платата е остварена во дејноста на трговија на големо со производи од тутун.
Уште еден скопјанец се најде на врвот во категорија највисоката капитална добивка во износ од 130,1 милион денари со продажба на сопственички удел.
Ова го соопшти директорката на Управата за јавни приходи, Сања Лукаревска врз основа на собраните податоци од годишните даночни пријави за 2021 година.
СИТЕ СЕ ПРОТИВ „ЗАЕДНИЦА НА АЛБАНСКИ ОПШТИНИ“
Со барањето за „Заедница на албанските општини“ некој сака да лови политички поени, вели министерот за локална самоуправа, Ристо Пенов.
Тој рече дека барањето на партијата Алтернатива за „поврзување на албанските општини“ е обид за ловење политички поени и повика да внимаваат со таквите изјави.
„Таквите барања можат да влијаат на меѓучовечките односи, кои за среќа се многу постабилни денес и претпоставувам дека граѓаните нема да се поведуваат по такви барања за декомпонирање на државата“, рече Пенов.
Ставот за Асоцијација на албански општини е мој личен, не на партијата, вели генералниот секретар на Алтернатива Зеќирија Ибрахими, за ТВ21.
„За поддршката на Претседателот на партијата за ова прашање ќе треба да го прашате него лично. Ставот за Асоцијација на албански Општини е мој личен, не на органите на партијата. Меѓутоа, јас сум генерален секретар на Алтернатива и не сум само поединец во партија. Но, за да бидеме прецизни, немало некој состанок во партија за овој став, кој е само мој политички став, потикнат од моите политички и интелектуални yбедувања.“, рече Ибрахими.
НЕВРЕМЕ ВО СТРУМИЦА
Силно невреме ја зафати попладнево Струмица, каде реки вода течат по улиците.
Порталот Струмица Денес објави фотофрафии и видео. Пишува дека струмичани вакво невреме не виделе со години. И за наредните денови се можни обилни врнежи од дожд во Македонија.
ЧИТАЈТЕ УШТЕ
Измените на Законот за игрите на среќа и за забавните игри се доствени во Собрание. Предлагачите бараат промените да се изгласаат по кратка постапка, па на предлог измените стои и европското знаменце.
ЦКБ Банка прокнижи профит од 620.000 евра и тоа е резултат на благото зголемување на нето приходите од камати, умереното зголемување на нето приходите од надоместоци и провизии во комбинација со намалените трошоци за резервации за кредити. Резултатите што го објавија сите банки чии акции котираат на берза покажуваат дека генерално расте профитабилноста на банките во услови на исти или умерено зголемени приходи од камати, провизии и надоместоци
За инвестициски кредит кој го зела од една домашна банка, компанијата за крзно „Димко Митрев“ од Велес дала под хипотека и под залог и недвижен имот, но и машини, во вредност од над 1,1 милион евра.
