ФАКТОР ИСТРАЖУВА: „Мега“, „Рапид Билд“, „Термалифт“ – Кумановски бизниси со најголеми добивки за 2023
Оливер Бојковски е бизнисменот чија компанија направи најголема добивка од сите останати во Куманово во 2023. „Мега Доо“ е друштво за изградба на станови и транспорт, а го поседува и малиот „Мега-Мол“ во скопско Ново Лисиче. Компанијата тргува и со градежен материјал и ималa 52 вработени до крајот на минатата година. Има раст на добивката од 24 отсто.
Во Топ-10 добивки во Куманово влегуваат и Бучен Козјак и Екстра Меин од млечната, односно сувомесната индустрија. Стандардно тука е и Рапид Билд, компанијата на Тони и Дејан Каранфиловски, за изградба на инфраструктура и станбени згради.
Во високата петорка оваа година е Јуниор-ПВЦ на Митко и Елена Николовски за продажба на опрема, уреди и цевки поврзани со водовод и парно греење. По нив е Термалифт ДД, на Драган, Фросина и Филип Дамјановски, за производство и продажба на дигалки и вилушкари.
Потоа доаѓа „Меркатан“, фирма со 30 вработени, каде доминатен сопственик е Боба Милиќ. За оваа фирма не можат да се извлечат многу информации, освен тоа што приоритетна дејност е „останати стручни, научни и технички дејности“.
Последните три во Топ-10 се Хромак за продажба на материјали и машини за малтерисување, Балканија ММ за санитарија и покуќнина и Алфи Би Компани, фирмата која ги поседува техноцентрите во Скопје и Куманово за продажба на домаќински апарати, опрема и реквизити. А.К.
Извор: Централен регистар
