Европската централна банка не ги зголеми каматните стапки за прв пат по 15 месеци
Европската централна банка одлучи да не ја зголемува референтната каматна стапка за прв пат по 15 месеци, бидејќи заклучи дека најбрзиот циклус на покачување на каматните стапки во нејзината историја се повеќе негативно влијае на економијата.
Ваквата одлука беше очекувана, откако претседателката на ЕЦБ Кристин Лагард навести пауза по минатомесечното зголемување на каматните стапки. Оттогаш и економската активност и инфлацијата продолжија да забавуваат, пренесува Политико.
Денешната одлука значи дека клучната референтна депозитна стапка останува на рекордни четири отсто, со основни стапки на рефинансирање и маргинални стапки од 4,50 и 4,75 отсто соодветно.
Според соопштението на ЕЦБ, се уште се очекува инфлацијата да остане превисока уште долго време, а домашните ценовни притисоци да бидат силни, но во исто време инфлацијата значително се намали во септември.
Централната банка соопшти дека ја оставила отворена вратата за понатамошни зголемувања на каматните стапки, велејќи дека „ќе се погрижи нејзините стапки да бидат поставени на доволно рестриктивни нивоа онолку долго колку што е потребно“.
Повеќето аналитичари, сепак, сметаат дека каматните стапки го достигнаа врвот и веќе шпекулираат за времето на првото намалување.
Според неодамнешното истражување на Ројтерс, повеќето економисти сега очекуваат тоа да се случи до третиот квартал на следната година, при што каматните стапки ќе паднат на 3,5 отсто до крајот на септември.
Годишната инфлација се намали на 4,3 во септември, од максимумот од 10,6 отсто пред една година, но останува двојно повеќе од целта на ЕЦБ од два отсто.
Во меѓувреме, податоците покажуваат дека економијата на еврозоната најверојатно ќе се намали во третиот квартал од оваа година.
