Европска унија воведува ограничување на украинските земјоделски производи

Европската комисија денеска соопшти дека до 5 јуни поставила ограничувања за увоз на украински земјоделски производи, со цел да се ублажи проблемот што настана со вишокот жито во Бугарија, Полска, Романија, Унгарија и Словачка. Извршното тело на Европската унија објави дека во тој период украинското жито може да се продава во која било друга земја-членка на ЕУ, освен во споменатите пет, кои се пожалија дека евтината цена на украинското жито им штети на нивните земјоделци, пренесе Ројтерс.

ЕУ претходно го олесни целиот увоз на стоки од Украина за да помогне во напорите на земјата да се одбрани од руски напад. „Производите можат да продолжат да транзитираат низ овие пет земји-членки на ЕУ преку заеднички царински транзит во или надвор од ЕУ“, посочуваат од Комисијата. Мерките на Комисијата вклучуваат и пакет за поддршка во вредност од 100 милиони евра за земјоделците во пет земји од ЕУ. ЕК, која инаку е задолжена за трговијата во ЕУ, рече дека би можела да дозволи продолжување на ограничувањата за увоз на жито во овие пет земји доколку продолжат вонредните околности, пренесува Танјуг.