ЕВН Хоме доби само една понуда на тендерот за набавка на струја за 2026 година – цената повисока за речиси 5 проценти
ЕВН Хоме, како Универзален снабдувач на електрична енергија, информира дека на тендерот за набавка на електрична енергија за потребите на домаќинствата и малите потрошувачи за периодот јануари–декември 2026 година, пристигнала само една понуда – од АД ЕСМ. Државната компанија понудила цена од 65 евра за мегават-час, со што ќе ги покрие 100 проценти од планираните количини за следната година.
Од ЕВН Хоме посочуваат дека понудената цена е за 4,84 отсто повисока од цената добиена на претходниот тендер за периодот јуни–декември 2025 година, кога АД ЕСМ понуди 62 евра за мегават-час.
Во наредниот период, Универзалниот снабдувач ќе ја пресмета крајната цена на електричната енергија, под целосен надзор на Регулаторната комисија за енергетика и согласно законските обврски и утврдената методологија. Пресметката ќе се врши врз основа на однапред дефинирани влезни параметри.
Од компанијата потсетуваат дека финалната цена што ја плаќаат граѓаните се формира од неколку компоненти: цената по која АД ЕСМ ја продава струјата на ЕВН Хоме, цената на преносниот систем на МЕПСО, услугите на операторот на пазарот МЕМО, како и трошоците на дистрибутивниот систем оператор – Електродистрибуција.
