Евентуалната казна од КЗК за маркетите би можела да биде во милиони евра
Ланците на маркети за кои Комисијата за заштита на конкуренцијата (КЗК) минатата недела соопшти дека се здружиле за да влијаат на цените во продавниците, би можела да одреди казна во висина од милиони евра за трговците.
Ако се утврди дека е направен прекршокот, четирите маркети и комората преку која се здружуваат ќе бидат казнети според член 59 од Законот за заштита на конкуренцијата или со 10 проценти од вредноста на вкупниот годишен приход остварен во последната деловна година, изразена во апсолутен и номинален изно, објави „Само Прашај“.
Според Законот, откако се доставени заклучоците до сите маркетите и до Комората, тие во рок од осум дена можат да достават против аргументи, по што ќе се донесе конечна одлука дали ќе има казни или нема да има.
Комисијата за заштита на конкуренцијата, преку соопштение до медиумите тврди дека неколку синџири на маркети нелегално се договарале за усогласено делување спротивно на Законот за заштита на конкуренцијата. Од таму известија дека ова било констатирано по направена ненадејна контрола кај правните лица, како и дека била поведена прекршочна постапка.
Комисијата за заштита на конкуренцијата изврши ненајaвен увид во 4 трговски субјекти и една стопанска комора во која се здружени истите, поради сомнеж за картелско здружување, односно договарање на цените.
При контролата во службените простории на правните лица, односно ланци на маркети кои вршат трговија на мало со прехранбени и непрехранбени производи, пронајдени се докази дека истите донеле незаконита одлука која и јавно ја објавиле преку средствата за јавно информирање.
Контролираните субјекти спротивно на Законот за заштита на конкуренцијата донеле забрана, односно се договориле дека ќе делуваат усогласено и нема да набавуваат стоки од добавувачи кои ќе достават нови ценовници за нивните производи, поради што е поведена прекршочна пријава против нив, се наведува во соопшението на КЗК.
