Еве колку ќе ја чинат ЕУ царините на Трамп
ЕУ очекува дека трговските истраги на Доналд Трамп би можеле да го зголемат обемот на царини за стоки од ЕУ на вкупна вредност од 549 милијарди евра, што би влијаело на речиси целиот европски извоз во САД, предупреди европскиот комесар за трговија Марош Шефчовиќ.
Зборувајќи пред членовите на Европскиот парламент, Шефчовиќ процени дека новата рунда американски царини, кои вклучуваат увоз на фармацевтски производи, полупроводници, дрва, критични минерали и камиони, би можеле да влијаат на дополнителни 170 милијарди евра од европскиот извоз.
Ова би значело дека дури 97 проценти од вкупниот извоз од Европската Унија во САД би бил опфатен со трговски мерки, објавува „Блумберг“.
„Овие увозни давачки се неосновани и предизвикуваат економска штета од двете страни на Атлантикот“, рече Шефчовиќ, додавајќи дека Европската Унија не може да биде пасивна во ситуација што ја опиша како „неприфатлива“.
Европската комисија подготви нацрт-документ што ќе ѝ биде презентиран на американската страна оваа недела со цел повторно започнување на преговорите, објави претходно њујоршката агенција.
Европската Унија ѝ предлага на администрацијата на Трамп, меѓу другото, намалување на царинските и нетарифните бариери, зголемување на европските инвестиции во САД, соработка во борбата против нелојалната конкуренција и зголемување на купувањето на американска стока.
Доколку преговорите не бидат успешни, ЕУ најави одмазднички мерки, вклучително и повторно активирање на царините за американски стоки во вредност од 21 милијарда евра, кои претходно беа суспендирани како гест на добра волја, но сепак се потребни понатамошни чекори, додава њујоршката агенција.
