ЕУ НЕМА ДА ГИ УКИНЕ САНКЦИИТЕ: Бараат руската војска да ја напушти целата територија на Украина
Европската Унија(ЕУ) не попушта во однос на Русија.
Безусловно повлекување на руските сили од Украина e предуслов за укинување на санкциите, велат од Европската Унија(ЕУ).
„Безусловното повлекување на руските сили од „целата територија“ на Украина е еден од главните услови за укинување или ублажување на санкциите наметнати од Европската унија (ЕУ) кон Русија“, изјави денеска портпаролот на ЕУ.
Белата куќа вчера објави дека Русија и Украина се согласиле да ги прекинат нападите во Црното Море.
„Русија, која е цел на санкции, може да смета на поддршката на Белата куќа за „да ги добие глобалните пазари за извоз на земјоделски и вештачки ѓубрива, да ги намали трошоците за поморско осигурување и да го подобри пристапот до пристаништата и платните системи за овие трансакции“, се вели во соопштението по разговорите меѓу американската и руската делегација во Саудиска Арабија.
Украинскиот претседател Володимир Зеленски не сака олеснувања за Русија.
Зеленски изјави дека „Американците сакаат да им покажат на Русите дека се во средина“ и дека американскиот тим не го крие фактот дека сака да биде посредник, а не да застане на една од завојуваните страни.
„Им рековме, добро, ако не сте на наша страна, тогаш барем останете на средина. Значи, ако Русите не го прифатат целосниот прекин на огнот што го предложивте, сакаме да видиме дополнителни санкции. Тие не мора да важат долго, исто како што не траеше замрзнувањето на помошта во нашиот случај. Навистина очекуваме американската страна да ги преземе овие чекори“, рече Зеленски во интервју за Тајм.
Тој додаде дека украинската војска во моментов е трипати поголема отколку што била во време на мир и дека буџетот на Украина не е доволен за нејзино финансирање.
foto freepik.com
