ЕУ ги укина одмаздничките тарифи за американските стоки кои се во сила уште од ерата на Трамп
Европската унија ги прекинува царините за американските стоки кои требаше да се применуваат до крајот на март 2025 година, воведени од Брисел како контрамерка на тарифите на Вашингтон за челик и алуминиум од ЕУ.
Европската унија одлучи да се воздржи од тарифи врз основа на договорот со САД во кој Вашингтон вети дека ќе ги суспендира и сопствените царини од 25 отсто за европскиот челик и давачките од 10 отсто за алуминиумот од ЕУ, пренесува Ројтерс.
Американските царини за челик и алуминиум од ЕУ беа воведени во 2018 година од страна на поранешниот американски претседател Доналд Трамп.
Вашингтон претходно се согласи да ги суспендира своите царини за европскиот челик и алуминиум на две години, почнувајќи од јануари 2022 година и да ги замени со квоти.
Американскиот систем на квоти дозволува увоз до 3,3 милиони тони челик од ЕУ и 384.000 тони алуминиум во САД без царина, додека дополнителните количини се предмет на царина.
Оваа одлука, треба да им овозможи на европските извозници на челик и алуминиум да заштедат приближно 1,5 милијарди евра годишно, објави Европската комисија.
Во вторникот, Европската унија објави договор со САД за продолжување на суспензијата на специјалните царини за производи од челик и алуминиум до март 2025 година.
Целта на тој потег е да се избегне понатамошна ескалација на долгорочниот трговски конфликт со САД што се појави под администрацијата на Доналд Трамп.
За возврат, беа суспендирани и европските царини за американските производи како бурбон виски, мотоцикли Харли-Дејвидсон и фармерки.
Тие европски царини првпат беа воведени како одговор на дополнителните царини за увоз на челик и алуминиум, воведени од Трамп во 2018 година.
Трајно решение за трговскиот конфликт требаше да се најде до крајот на оваа година. Сепак, на самитот САД-ЕУ во октомври не беше постигнат договор, што доведе до продолжување на суспензијата на царините.
Како причина за неуспехот Брисел ги наведе недоволните отстапки од САД, бидејќи Вашингтон наводно сакал да прифати решенија кои не се во согласност со правилата на Светската трговска организација.
