ЕУ да преиспита колку пари дава на Србија која поддржува антидемократски режими
Да се преиспита финансиската помош од ЕУ за Србија, бараат европратеници.
Пратениците на Европскиот парламент ја повикаа Европската унија да го разгледа обемот на финансиската помош што ја дава на Србија доколку оваа земја продолжи да ги поддржува антидемократските режими, пренесува Бета.
Во извештајот усвоен од Комисијата за надворешна политика на Парламентот (АФЕТ), претставниците забележаа дека преговорите за пристапување во ЕУ со Србија треба да напредуваат само ако таа земја ги почитува санкциите на ЕУ против Русија и ако направи значителен напредок во реформите поврзани со ЕУ.
Европратениците изјавија дека процесот на пристапување на Србија треба да се определи со напредок во владеењето на правото и основните права, функционирањето на демократските институции, посветеноста на споделување на европските права и вредности и нормализација на односите со Косово.
Европратениците констатираа дека од Извештајот на Европската комисија за Србија од 2020 година, оценките за состојбите во 33 поглавја од преговорите не се подобрени и дека во Извештајот за 2022 година не е постигнат „добар напредок“ во ниту едно поглавје.
И претходно имаше изјави од поединци дека Србија ја користи ЕУ како банкомат, а ја поддржува Русија и не воведува санкции.
„Вучиќ ја користи ЕУ како свој банкомат“, изјави во март годинава холандскиот европратеник Тејс Ројтен од групата на социјалдемократите.
Русија го користи своето влијание во Србија обидувајќи се да ги дестабилизира и да се меша во соседните суверени држави, се вели во извештајот усвоен од Комитетот за странско мешање во Европскиот парламент (ЕП) на 26 април.
