ЕСМ на „тенка линија“ со стратегијата за РЕК Битола: Ќе меша високоенергетски со слаб домашен јаглен
ЕСМ објави повик за набавка на висококалоричен јаглен од рекордни 1,4 милиони тони, а во тендерската документација може да се прочита дека тој ќе се меша со постоечкиот пелагониски лигнит кој ќе се ископува во рудниците на РЕК Битола. Претходно експерти предупредуваа дека ваквото комбинирање може да предизвика контраефект.
Од јагленот, чиј најголем дел се очекува да биде увезен, се бара да има висока енергетска вредност од 7.000 до 12.500 килоџули по килограм. Ова е количински далеку најголемата набавка од страна на други компании за потребите на ЕСМ, односно на РЕК Битола.
„Јагленот ќе се користи за облагородување на постоечкиот, односно ќе се меша со цел да се добие јаглен со карактеристики во рангот на проектните“, се вели во тендерската документација, каде што уште стои дека послаб јаглен од 7.000 килоџули нема да се прифаќа.
По долгогодишните ископувања во рудниците околу комбинатот сѐ потешко е да се најде квалитетен локален лигнит. ЕСМ пред две години за време на енергетската криза соопшти дека ќе увезува висококалоричен јаглен што ќе го меша (хомогенизира) со домашниот, за да добие соодветна смеса што ќе се користи во комбинатот.
Тоа беше дел од амбициозниот план на државата за справување со енергетската криза – наместо струја, да увезува енергенси, со кои ќе произведува електрична енергија во домашните капацитети и целосно ќе ги покрие домашните потреби.
Сепак поранешни раководители на РЕК Битола реагираа дека висококалоричните јаглени во комбинација со слабиот пелагонсики лигнит може да предизвикаат оштетувања во опремата на блоковите и застој во производството. Од таму и големиот број на тендери за адитиви и други материјали за отстранување на згурата во котелот на блоковите која што предизвикува застој во работата.
„Доколку се земе во предвид дека и
годинава како и лани, планирано е зголемено производство на електрична енергија
од РЕК Битола, а рудниците ПЈС Суводол и Брод – Гнеотино имаат можност да
испорачаат околу 4.000.000 тони јаглен, тогаш разликата до потребите околу
6.000.000 тони јаглен за непречена работа на Термоелектраните на РЕК Битола се
надополнува со јаглен од увоз. Скоро идентична количина на јаглен беше увезена
за потребите на РЕК Битола и минатата година“, гласи одговорот кој го добивме
За период пократок од шест месеци „Марковски компани“ на Борче Марковски доби три тендери од ЕСМ во вредност од 80 милиони евра за ископ на јаловина и лигнит во рудницитена РЕК Битола. Од опозицијата реагираа дека „Марковски компани“ ќе го добие и овој повик за набавка на 1,4 милиони тони јаглен и дека за тоа ќе наплати 100 милиони евра.
А.К.
