ЕСМ најде привремена замена за „Марковски Компани“ во РЕК Битола
АД ЕСМ потврди дека е склучен „договор во четири очи“ со градежната фирма „Топлина Подмолје“ за ископ на јаловина и јаглен во рудникот Брод Гнеотино за потребите на РЕК Битола.
„Топлина Подмолје“,според денешната реакција на државните електрани, ќе биде привремена замена за „Марковски Компани“ со кого пред еден месец беше раскинат договорот од 46 милиони евра.
– АД ЕСМ склучи договор со фирмата „Топлина“, за ископ на јаглен и меѓуслојна јаловина во РЕК Битола. Станува збор за привремено ангажирање на економски оператор до изборот на изведувач на објавениот јавен повик за истиот предмет на набавка, за кој постапката за избор на изведувач е сè уште во тек.
Изборот е направен со претходно добиена согласност од Бирото за јавни набавки испратена до АД ЕСМ на 17 декември, 2024 година, преку постапка со преговарање во случај на крајна итност, согласно член 55, став 1 од Законот за јавни набавки. Итноста се должи на потребата од обезбедување на доволни количини на јаглен за континуирано производство на електрична енергија во термоелектраните „Битола“- согласно планот за производство.
За време на постапката, Комисијата за јавни набавки при АД ЕСМ, испратила покани до пет компании кои во последните пет години за истиот предмет на набавка во својство на самостојни понудувачи- редовно учествувале на јавните огласи за ископ на јаглен и меѓуслојна јаловина во РЕК Битола. Најниска цена за услугите понудила фирмата „Топлина“. Според преговараните услови, избраниот изведувач ќе ги извршува задачите за околу 15 отсто пониска цена во однос на економскиот оператор со кој на почетокот на минатиот месец – РЕК Битола еднострано ја раскина соработката заради непочитување на одредбите од договорот, објави ЕСМ.
Според објавата на Бирото за јавни набавки, склучена е рамковна спогодба со вкупна вредност од околу 1,15 милиони евра. Овој договор е ограничен на шест месеци, што е поразлично од вообичаената практика каде договорите се потпишуваат на една до две години. Вредноста на новиот договор е значително помала во споредба со претходниот договор од 46 милиони евра, кој беше потпишан со фирмата „Марковски компани“.
Минатиот месец, РЕК Битола го раскина договорот со „Марковски компани“, објаснувајќи ја одлуката со „неодговорното постапување“ на фирмата која не ги исполнила своите обврски, што ја загрозило енергетската стабилност на државата.
