ЕСМ ќе ја складира струјата, ќе гради батериски систем
Со новиот Закон за енергетика ќе биде потребно 20 отсто од инсталираната моќност на произведувачите на струја , односно од фотоцентралите и другите извори на обновливи извори на енергија, во иднина да се складира во батерисики сиситеми, а тоа како обврска да го изгради ќе има и државното електростопанство.
АД ЕСМ во координација со АД МЕПСО и со Министерството за енергетика е во процедура за добивање заем за „Систем за батериско складирање на електричната енергија“ кај Европската банка за обнова и развој како меѓународен кредитор. Прво ќе треба да се изработи проектот, а потоа да се пронајде и изведувач на јавен повик.
Со складирањето ЕСМ ќе може евтината попладневна електрична енергија да ја зачува, а по неколу часа да ја продаде кога цените ќе бидат значително повисоки. Оваа струја би се продавала преку фирмата-ќерка ЕСМ продажба.
– Ние како МЕПСО само ќе менаџираме со тој батериски систем во делот на балансирањето кога ќе треба да се израмни побарувачката со производството на електрична енергија, а се друго ќе биде за продажба, а тоа ќе го прави ЕСМ, ни изјави Александар Пауноски, заменик-директорот на МЕПСО.
Надлежните спасот го бараат во батериски системи за складирање на вишокот произведена струја. Македонија поттикнуваше поставување фотоволтаици и сега доживува „бум“ со производство на струја од обновливи извори на енергија, коишто мрежата не може целосно да ги прифати. Новата легислатива треба да овозможи да се продаде целокупната произведена електрична енергија.
Секој инвеститор што ќе изгради батериски систем, односно таканаречениот „сториџи“, ќе учествува на пазарот како оператор на складиште и ќе може да купува и продава електрична енергија.
Претходно од енергетската aсоцијација реагираа дека големата инсталирана моќност на електрани од обновливи извори на енергија може да предизвика штета на преносниот систем и мрежа. Од Асоцијацијата побараa да биде законски регулирана струјата што се произведува од многуте фотонапонски централи кои што се градат и допрва ќе се градат, со складирање на електричната енергија во таканаречени „сториџи“. Инсталирањето на батерии кај електраните ќе им овозможи на инвеститорите да продаваат електрична енергија и во периодите кога побарувачката е помала од понудата со што ќе имаат многу подобар пазарен продукт и на тој начин нема да имаат загуби од нивното инсталирање.
Во последните години интересот за изградба на нови објекти за производство на електрична енергија енормно се зголеми што доведува до ситуација на непланско градење и на проблеми на инвеститорите со обезбедувањето на приклучок на мрежа, продажба на електричната енергија и воопшто со балансирањето на електроенергетскиот систем.
Со измените на важечкот Закон за енергетика за прв пат се регулираше дејноста складирање на енергија, но се поголемиот интерес за инвестирање во складишта на енергија, ја наметна потребата попрецизно да се регулираат прашањата кој, кога и како може да користи складиште.
А.К.
