Ердоган: Хамас е група „муџахедини ослободители“, вразумете го Израел
Светот е поголем од петте постојани членки на Советот за безбедност, вразумете го Израел, вели турскиот претседател Реџеп Таип Ердоган.
Ердоган ги обвини државите надвор од регионот на Блискиот Исток дека само „долеваат масло на огнот“ со пружањето поддршка на Израел, додавајќи дека Соединетите Американски Држави (САД) заедно со Израел ќе ја изгубат оваа војна бидејќи се против правдата и порача дека неговата земја никогаш нема да ги одобри злосторствата на Израел.
„Речиси половина од убиените во израелските напади во Газа досега се деца, што покажува дека целта е планска бруталност во извршувањето злосторства против човештвото“, оцени Ердоган во Анкара.
Ердоган го повтори својот став дека „Хамас не е терористичка организација“, туку група „муџахедини ослободители“ кои се борат да ги заштитат својата територија и луѓето.
„Заедничко дејствување на исламските земји би довело најпрво до примирје, а потоа до траен мир на Блискиот Исток“, смета Ердоган.
Кажа дека Турција е спремна да биде еден од гарантите на мирот за палестинската страна.
Во Појасот Газа денеска влегоа 12 камиони со хуманитарна помош, јавија локалните медиуми. Во камионите има храна, вода и лекови, пишува Тајмс оф Израел. Со тоа бројот на камиони со хуманитарна помош што влегоа во Газа изнесува 74.
Израелските одбранбени сили (ИДФ) соопштија дека денеска во напад на Појасот Газа го убиле заменик-шефот на Дирекцијата за разузнавање на Хамас, Шади Баруд, пренесува „Тајмс оф Израел“.
