Ербас ќе испорача 160 авиони во Кина
Ербас постигна договор за отворање нова производствена линија за склопување авиони во Кина, објави Ројтерс.
Европскиот производител на авиони ќе го удвои своето производство во азиската земја, откако владетелите на Пекинг дадоа конечно одобрување за договорот со кој Ербас ќе испорача на Кина 160 авиони.
Договорите со кинеските власти ги потпиша извршниот директор на „Ербас“, Гијом Фори, кој го придружуваше францускиот претседател Емануел Макрон во неговата државна посета на Кина.
Минатата година европскиот производител на авиони објави дека и продал 292 авиони на Кина.
Од 2008 година, Ербас склопува патнички авиони А320 во производствен погон во северниот кинески пристанишен град Тијанџин. Претходниот комерцијален договор објавен во 2018 година предвидуваше 6 авиони месечно да се градат во оваа фабрика.
Новата производна линија би требало да го удвои бројот на авиони Ербас собрани во Кина.
Втората по големина економија во светот претставува повеќе од 20 отсто од глобалниот авијациски пазар, забележуваат Ројтерс.
