Енергетско партнерство за сигурност и одржливост во регионот: Македонија и Косово потпишаа Меморандум за соработка
Македонската и
косовската влада одржаа заедничка меѓувладина седница во Приштина по која се потпишаа протоколи и меморандуми за
соработка.
Министерството за енергетика, рударство и минерални суровини на
Македонија и Министерството
за економија на Република Косово, потпишаа Меморандум со кој се поставуваат
темелите за интензивирање на билатералната соработка во енергетскиот сектор. На потпишувањето присуствуваа и премиерите на двете
земји, Христијан Мицкоски и Албин Курти.
Меморандумот го истакнува заедничкиот интерес на двете земји за развој
на стратешко партнерство во енергетиката преку усогласени политики и активности
кои ќе придонесат за економски раст, енергетска сигурност и рационално
користење на природните ресурси.
Со потпишувањето на овој документ, Македонија и Косово се обврзаа да
соработуваат на повеќе клучни области, вклучувајќи:
- Промоција на обновливи извори на
енергија и енергетска ефикасност. - Размена на експертиза и информации меѓу
јавните компании. - Развој на инфраструктурни проекти од
заеднички интерес. - Истражување на можностите за размена на
електрична енергија и ресурси.
„Со овој меморандум ги зајакнуваме не само нашите енергетски системи,
туку и нашата визија за стабилен, одржлив и поврзан регион. Уверени сме дека
оваа соработка ќе донесе значителни придобивки за двете земји и ќе послужи како
пример за партнерство во Југоисточна Европа.“, истакна Министерката Сања Божиновска.
Меморандумот ја нагласува важноста на енергетската транзиција и
неопходноста од заеднички напори за одговор на глобалните енергетски
предизвици, особено во контекст на климатските промени и енергетската криза.
