ЕНЕРГЕТСКИ ХАОС: Инвеститори бараат да градат 8.600 мегавати, а мрежата на МЕПСО може да прими само 1.500
Македонија се соочува со вистинска „златна треска“ за инвестиции во зелена енергија, но државната електропреносна мрежа е целосно неподготвена да го издржи тој притисок, што создава енергетски хаос и го кочи развојот, открива најновиот извештај на Државниот завод за ревизија (ДЗР). Ревизорите утврдиле дека барањата за приклучување на нови соларни и ветерни централи се речиси шест пати поголеми од капацитетот што мрежата може да го прифати.
Според извештајот, до операторот на преносната мрежа АД МЕПСО се стигнати барања за приклучување на производители на струја од обновливи извори со вкупна моќност од неверојатни
8.663 гигавати (GW), од кои 6.828 GW се за фотоволтаични централи, а 1.835 GW за ветерни паркови. Сепак, студиите покажуваат дека капацитетот на мрежата во моментов може да прифати само до 1,5 GW.
Поради оваа огромна разлика, АД МЕПСО не може да ги одобри повеќето барања од технички аспект.
Главната причина за овој хаос, според ревизорите, е недостатокот на стратешко планирање. Тие констатирале дека Владата нема усвоено
„Индикативен план за изградба на капацитети за производство на електрична енергија од обновливи извори“. Поради ова, отсуствува јасна стратегија за избор и приоретизирање на проектите, што остава простор за несоодветно одлучување.
Ревизијата дополнително предупредува дека приклучоците на дистрибутивната мрежа не се усогласени со капацитетот на преносната, што може да предизвика дополнителни технички ризици за целиот систем. Ваквата состојба, заклучуваат ревизорите, сериозно ја загрозува енергетската транзиција и претставува огромна кочница за милионските инвестиции во зелена енергија.
